مصر مسجد وكنيسة
**************************************************
كنت بليلة رأس السنة ياناس سهران
أحلم بسنة جديدة فيها حب وحنان
بعد نص الليل بحوالى نص ساعة
كان ولدى لسة مخلص الإمتحان
قالى يابابا مايكل صديقى عمال بيعيط
الإهمال قتل عمه وطفلهم الصغيركمان
رديت ياأحمد حصل العدوان ده إزاى
قالى يابابا إهمالنا دبح الأمن وقتل الأمان
أناومايكل بقيناخلاص دكاتره لكنى زعلان
على صاحبى مايكل وصديقى الإنسان
أعزيه إزاى هربت منى الكلمات
صعب عليا أباركله إزاى ويا الأحزان
كان عمه وعيلته بكنيسة القديسين
بيصلواقداس العام الجديدبعروس الأوطان
وعمه بالكنيسة جرى ورا إبنه بيتر
وفجأه جهنم أكلتهم الإتنين وراحوا بثوان
يصرخ مايكل ويقول إبن عمى ياأحمدراح
وعمى إستشهد مع بعض الجيران
لسة برضك عندك أمل ياصاحبى بهذاالعام
وهيه كده بدت بكابوس للنايم والسهران
بيقول لحم الشهدا متعلق بالجدران
باب الكنيسةالدم خلعه وعمله تابوت للناس
وإختلط الدم والعظم واللحم ويا النيران
لسة عندكوا أمل فى حكومة الشيطان
اللى سايبه الجبان يسرق ويقتل
وولع الجامع بالشبابيك والحيطان
الحقيقة أحمد ومايكل بقوا دكاترة
كان نفسى يوميها أكون فرحان
بس إزاى أنا أفرح وحبايبى حزانى
وإزاى ياناس مخى حايجيلوا جنان
بطرس وجورج وأبنوب وبيتروسليمان
محمد وأحمد وعمر ومعاهم عدنان
كلهم بقلوبهم مع شدتكم ومصابكم
بيدعواربنايرحم الشهداويشفى الجرحان
ويخلصنا من التسيب والإهمال والقهر
اللى خلت بلادنا زى العراق والأفغان
**********************************************
تأليف الشاعر المهندس/ فاروق بن النيل
الساعة الرابعة صباح الثلاثاء 4يناير2011م
هناك 47 تعليقًا:
السلام عليكم يا عم فاروق
تحياتى
يا سيدى ما تاخدش على بالك .. احنا احسن ناس تقول كلام وخلاص وبنخترع شعارات ومن اجلك انت والهجص دا كله .. يا سيدى ما جاتش على الكلمتين دول
وعليكم السلام ياعم صلاح.......
لأه ياصلاح تتصور إن الموضوع ده حاسس إنه القشة اللى حتقصم ظهر البعير ربنا
يخلصنا من الظلمة المهملين شرفتنى وواحشنى
السلام عليكم ورحمه الله وبركاته
ربنا يهدي النفوس وترجع مصر
بلد الامن والامان
مسيحي مسلم واحد
واعيين وفاهمين
بارك الله فيك استاذي
المشكلة فى النظام لان من خمسين سنة كنا احنا نفسنا عايشين لكن النظام كان مختلف
النظام الحالى مش بس فاقد العدالة و معدوم الضمير لكن غبى كمان و مش فاضى من كتر السرقة فسايب التطرف و بيغذيه احيانا بقصد و احيانا بدون
دعوتى دائما للهدوء و اننا نعرف ان لو فضلوا المتطرفين يتكلموا و يتصدروا المشهد الدنيا ح تولع و الحريقة مش ح تفرق بين واحد و التانى و الدليل ان اول واحد مات فى تفجير الكنيسة كان بائع المصاحف اللى قاعد فى الشارع لان الجامع قدام الكنيسة و اللى فجر قصد انه يختار المكان ده بالذات عشان يمسك الشعب فى بعضه مع ان لو هو قاصد المسيحيين بس كان اختار كنيسة مش قدامها جامع فى شارع ضيق كده و دول كتير فى اسكندرية
احنا كشعب مسئولين..كلنا مسئولين لاننا سلبيين و كل واحد همه لقمه عيشة و سبنا نظام فاسد يرتع...المسلمين كانوا سلبيين و بينزلوا مظاهرات فى حاجات بتحصل بره مصر لكن مش بيثورا لحقوق المواطن و الحرية و الديمقراطية و المسيحيين برضة كانوا على طول بيعلنوا تايدهم لمبارك و لجمال و ينزلوا يصوتوا لهم بالامر خشية من ان يكون البديل الاخوان
بس التجربة اثبت ان النظام فاسد و ضباطه مجرمين و قتلوا خالد سعيد و غيره كتير مسلمين و غضوا الطرف عن قتل المسيحيين لان فى النهاية همه ضد المصريين جميعا
الحل فى تغيير هذا النظام ...عايزين دولة مدنية و دستور محترم و تداول سلطة و رئيس مش خاين و لا عميل و لا فاسد و لا طاغية
استاذ فاروق
اللى بيحصل كله اعراض لمرض وخلل ما
خلل سياسى ....استبداد وغياب الحريات
خلل اعتقادى...فهم خاطئ للدين
خلل اقتصادى,,,بطالة وفقر
خلل ومرض ومشاكل لا حصر لها ورغم ذلك
فالفهلوة هى الحل الذى يتهافت عليه الجميع
احييك على مشاعرك النبيلة
وكثر خيرك انك بتقول كلمة حق
تقبل تقديرى واحترامى
أستاذي فاروق
الكلمة أبلغ رسالة
والصرخة أقوى نداء
والدمعة أشد حزن
والاسلوب افصح تعبير
والي انت حاسو وانت فيها انا حساه وانا بعيدة عنها
والخوة لا هي بوطن ولا دين ولا عقيدة
الاخوة حب وصدق وايمان
دي يمكن زي ماقلت النقطة الي حتخلي الكاس يفيض
ويمكن تكون الصفعة الي حتفيق الناس من الغيبوبة الي هم عيشين فيها
بس الحرية لها ثمن وبتشر شراب احمر من دم البشريه
يعني التضحية لازم اكون فيها انا وانت واحمد ومايكل وموسى وناس كثيرة علشان اطفالنا يعيشو احسن لو ربناا اراد
تحياتي
ربنا يكرمك ياأستاذ فاروق وأنا فعلا حزينة من قلبى وزعلانة أكتر أن فيه ناس مستخسرة أننا نزعل
تحياتى لك وربنا يستر على بلدنا يارب
كلماتك مؤثرة
حفظك الله وكفاك وكفانا شر الفتن
رائعة
صورة مافرقتش كتير عن الواقع
لوحة جميلة تسلم ايدك
السلام عليكم ورحمة الله
استاذى العزيز
حقيقى لم يعد لدى اى كلام ليقال
لكن ارى اصرار غريب من بعض المتعصبين من كلا الطرفين لا يدل ابدا على نية الهدوء والتفاوض
ارى يد سوداء تحركهم من بعيد
ولم اعد متفائلة لكن اقول مثلك ستكون القشة التى تقصم ظهر البعير
نسأل الله الخير ان شاء الله
جزاك الله خيرا استاذى
دمت بكل امان
السلام عليكم
كعادتك احسنت صياغة ما بداخلنا
صحيح ازاى نفرح وجنبنا اخواتنا بيتألموا
ازاى نضحك واخواتنا الدموع مالياهم
فالحين نتكلم ونشجب ونستنكر وندين وفى الاخر احنا بردوا اللى بنموت
ربنا يستر عليكى يا بلدنا كلك على بعضك مش حته وحته لأ
تقبل مرورى
السلام عليكم
أستاذ فاروق شدني الأسف كثيرا لما حدث في مصر، وأسأل الله تعالى أن يصلح الأحوال، وأن يجازي الظلمة على ظلمهم.
تحياتي لك وأتمنى أن تكون بصحة جيدة.
www.hams-rroh.net.tc
www.adwae.net.tc
كارولين فـــــــــــــــــــــــاروق
أشكرك على تعليقك سوف تعود مصر غن شاء الله بأمان إذا خرج حزب الشيطان
تييرز Tearsالعزيزة الغالية.....
لن ينتهى التطرف والحقد والفوضى إلا كما قلتى تداول السلطة ورئيس مش خاين ولاعميل ولافاسد ولاطاغية
خاين لشعبه
عميل لأمريكا وإسرائيل
فاسدبأحكامه والإنتخابات ومال الدولة
طاغية بالحكم وعدم إرساء الديمقراطية
شكرا لكى عزيزتى
أستاذ/ صلاح .....Sal
شكرا جزيلا على كلامك الدقيق والصريح ولاتقل لى كتر خيرك إنك بتقول الحقيقة لأنه واجبنا جميعا وشكرا لك
شهرزاد .........
لو كلنا كنا نطبق كلامك هذا كان حالنا
إتغير للأحسن وكنا خلصنا من الفساد والإرهاب شكرا لكى على تواجدك وتعليقك المميز
Mona
دى حاجة تحزن والله دول موش أبدا بنى آدمين ولامصريين ولايستحقوا أن يكونوا إنسانيين اللى مايحزنش على اللى حصل ده دا شيئ والله يغضب ربنا ورسوله
شكرا لكى يامنى
كلام حضرتك وتيرز اعجبني لأنه حقيقي جدآ
ولكنكم نسيتوا شيء أهم قبل تغيرالخاين وتداول السلطة
لازم الناس أساسآتفوق ...تفوووووووق
من النومه دي لأن بجدكده مش هينفع أناحاسه أن قريب أوي هلاقي دبابات أمريكاوأسرائيل في ميدان رمسيس
حاسه أني هبقي ماشيه في الشارع والأقي فجأة أنفجاريهزمصر ياأماأموت ياأماأقف مذهوله وعندي أنهيارمن اللي هشوفه
وعلي فكرة اللي ماتواوأتصابوا"مش مسيحين " بس في مسلمين برضه وللأسف مش سمعت أي حدجبربخاطرهم بكلمة نفاق حتي ..
ايه ياجماعة المسيحين ع راسنابس مش كده فعلآ اللي حصلهم كتيربس مش لوحدهم
اللي أتأذوا وأتضروا
مصر ربنايرحمهاويرحمنابجد
ماما أمولة..........
الموقف هذا لم أراه إلا بالصور والفيديو فبكيت فكيف بالحقيقة رؤيا بالعين وأنتى ترين اللحم والدم ملتصق بجدران الكنيسة وحيطان الجامع ورؤوس مفصولة عن الجسد وأذرع وأرجل وأشياء داخلية للجسم وأجساد تحولت إلى أشلاء هذا هو المؤثر وليس كلامى شكرا لكى
AHMADE SAMIR
إنت اللى رائع طالما إنك إتأثرت بهذا الموقف والشعر ماهو إلا تعبير بسيط عن طيف مما حدث شكر لك أحمد سمير
carmen
الواقع أقسى وأمر بكثير ياكارمن
شكرا لكى
أم هريرة(لولو كات).....
الإنفجار كان يحب أن يكون من الشعب ضد الحكومة وليس إنفجارا ضد الشعب
رد الفعل من الناس المصريين عامة نتيجة الإنفجار ونتائجه ,الزلزال وتوابعه شيئا طبيعيا بل إننى أؤكد أن الإنفجار الحقيقى من الشعب المصرى ضد النظام على وشك الحدوث لإنفعال الناس من إهمال الدولة وبعد إنتخابات مزورة ... شكرا لكى
محمود( مدونة رحلة حياة......
شوف نحن بشر خلقنا الله جميعا ونشعر ونحس بالحزن والألم والبسمة والفرحة يجمعنا إحساس واحد ومشاعر واحدة ويجب أن نواسى بعض ونعزى بعض ونهنئ بعض فنحن ببلد واحد شكرا لك
أبو حسام الدين.....
الذى يحدث فى مصر نتيجة لغياب القانون وعدم تطبيقه وإنتشار الفساد والرشوة والسرقة...
أصبح قانون البلطجة هو السائد فى مجتمعنا حتى من الحكومة وحتى من مطبقى القانون وأقصد من بعض رجال الشرطة وبعض رجال القضاء للأسف
شكرا لك صديقى
أفروديت ................
لا أنا ولا تييرز نسينا الموضوع ده لأن الشعب أو إحنا اللى حانغير الرئيس ده موش حايتغير من نفسه أو من عند ربنا
" إن الله لايغير مابقوم حتى يغيروا مابأنفسهم " صدق الله العظيم ....
شكر ا لكى
أستاذنا الفاضل: م/ فاروق
مصر محقوظة بمشيئة الرحمن ولن تكن عراقاً ولاأفغانستان.
جاول الأعداء كثيراً وفشلوا ..ومازالوا يحاولون ومازال الرابط قوياً.
ولكن هذا لايمنع أننا لابد أن ننتبه ونتحرك وننبذ كل صور القتنة والطائفية
والله تعالى هو القادر فوق عباده
تقبلى سيدى الفاضل خالص تقديرى واحترامى
بارك الله فيك وأعزك
استاذى
كنا نردد ادخلوها امنين
الان ان دخلوها فهم اكيد مقتولين
بس اكيد ده سببه احنا استلامنا وصكوتنا
خاطرة استطعت ان تعبر بها عما بداخل كل منا
واكيد بعد الليل فيه نهار
بس الليل طال
تحياتى
استاذي العزيز
هذا الحادث اثر فينا جميعا
وكتبنا كل منا علي قدر ما يستطيع
دمت بخر ودامت كلماتك معبره دوما
شوف الفيديو ده
و اتفرج الامن بيضرب المسلمين و المسيحببن اللى بيهتفوا للوحدة الوطنية و بيفتح دماغهم ازاى
http://www.youtube.com/watch?v=7bYlgZi0Wqw
و بعدين اقرأ هنا و شوف عملوا فيهم ايه على طريقة ضربنى و بكا و سبقى و اشتكى
http://www.youm7.com/News.asp?NewsID=331096&SecID=65
المشكلة بين المصريين و النظام اللى محتلنا باتنين مليون شرطى باسلحتهم و نحن عزل
مش بين افراد الشعب اى ان كان دينهم او انتماءهم
ده مش للنشر
.....................
فوجئت بتدوينة ولاء انها ح تغلق المدونة و مش ح تعلق عند اى حد فينا تانى...اتمنى تكون بخير و ما يكونش حد زعلها للدرجة اللى تخلى رد فعلها حاد كده لان فعلا هى عقل محترم و بتفكر كويس و خسارة انها تنسحب او تستسلم لاى ضغط
لو سمحت وصل لها تحياتي و قولها لو اى حد زعلها على النت او فى المدونات فاحنا ناخدلها حقها و زيادة من غير ما تضطر تفرط فى مدونتها و تكسر قلمها او تمنع عقلها من التفكير و التفاعل
أستاذنا الفاضل/محمد الجرايحى.........
لقد ساءت الأحوال جدا وأخشى ماأخشاه أن تتحول مصرنا لفتنة طائفية نحن فى غنى عنها ربنا يسترها علينا وشكرا لك
جايدا(عايدا) العزيزة الغالية...
حمدالله على السلامة جيتى ولا الشرم واخدك بس برضه معانا بكلامك النارى( إدخلوها مقتولين) شكرا لكى ومستنيين البوست الجديد
رحاب صالح .............
يجب أن نتكلم ونكتب ولانمل أن نقول الحقيقة ونشارك إخواننا فى الوطن معاناتهم وأحزانهم أدعوا الله أن يفرحهم ويرفع عنهم الغم والهم والألم والحزن
شكرا لكى
تييرز العزيزة الغالية........
سأرى الفيديو والرابط الملحق وشكرا جزيلا لك
Tears العزيزة الغالية....
ليه موش للنشر داموضوع فى منتهى الأهمية ويهم الجميع وقد إتصلت بها وهى سعيدة ومافيش حاجة وقولتلها ماقولتيه وبعتلها طلبك وإحساسك كمان برسالة بس هى يمكن موش عايزة تتكلم لكن بتقول مافيش حاجة ونحن ننتظر لأنى متعود مع أهلى ألا أضغط على أحد ليتكلم المهم هى بخير وبتشكرك جدا
Tearsالعزيزة الغالية.......
لم يفتح رابط الفيديو لى باليوتيوب
لكن قرأت الرابط الآحر (اليوم السابع) وعلقت على الحدث ولم يعجبنى تعليقات بعض المصريين فيها سلبية وجبن
ودى مشكلتنا عموما الأمن والشرطة بتضيع مجهودها الباشوات فى التغطية على كفاءتهم العالية بالفشل الذريع اللى سببه الرشاوى وناس أصلا فاشلين فى دراستهم وكانوا صيع ودافعين رشاوى لدخول كليةالشرطة فماذا تنتظرين منهم سوى الجهل والغل والبلطجة والفساد طبعا عدد كبير منهم وليسوا الكل حتى لاتظلم الصالحين وإن كانوا قلة جدا حتى أن لى صديق شرطى عميد جارى خرج معاش وسواه لعدم موافته على ماتقوم به الشرطة حسب قوله من تجاوزات كثيرة
جربت الفيديو من التعليقات هنا و بيفتح عادى
http://www.youtube.com/watch?v=7bYlgZi0Wqw
شكرا كتير اخي على الموضوع
وان شاء الله نكون يد واحده
تحياتي
ميس فلسطين .........
أشكر الله وأشكرك على تواجدك معنا وبقلبك ودمتى أختى
تييرز العزيزةالغالية.......
سوف إطلع إن شاء الله على الفيديو وسأعطيكى رأيى إن شاء الله وشكرا على إهتمامك .
إرسال تعليق