********************************************************
*!* خمسة وعشرين وزين الهاربين*!*
كنت دايما ضد المتظاهرين * ببلاد تحترم البنى آدمين
أمال بطوارئ وعسكر داخلية* بمصر يستغلوا سلطتهم مجرمين
قامت تونس بثورة شعبية * والجيش طردوا زين العابدين
ساعتها رجعلى الأمل ببكره* وحلمت برئيسنا زين الهاربين
ماهو لازم ياجماعة نتحرك* مانفضلش على طول مهزومين
زمان الناس كانت أجرأ* وبالأخص النساء وهمه محجبين
وكنت تلاقى الوحدة الوطنية* مسلم ومسلمة ويا كل المسيحيين
لأن الدين وحده لله * لكن الوطن لجميع المصريين
ولو وصَّلْنا ده للحاكم الظالم * حايهرب قبل مايضيَّع ملايين
لما هرب بن على من تونس* تمنيت شبابنا يقوموا ثائرين
حكامناضيَّعواثرواتنا وشرفنا* وكرامتنا إتباعت بسوق النخاسين
ساعتها عرفت ووصلت للحل* نتظاهر يوم خمسة وعشرين
يمكن بارقة أمل تتحقق* وحسنى وجمال يكونوا مطرودين
بس ياولاد بلادنا حلوة* إوعوا تدمروا وخليكوا صالحين
إحرقوا قلوبهم دمرواعقولهم* إكسروا نفوسهم وخلوهم معتوهين
ساعتها الإعلان عن التظاهر*أفضل وتأثيره حايدمر العاصيين
إصحى يانايم ووحد الدايم * وكفاية غفلة وإترك النايمين
وإرفع رأسك ياأخى وكرامتك* إوعى يمرمغوها تانى بالطين
وياشرطى أخوك إبن بلدك* ويوم عيدك ماتخلهوش حزين
وإفتكراللى قبلك بالإسماعيلية*الشهدابيحيوكم أويعتبروكم ملعونين
وياحسنى إنتى وجمال الأفضل*تمشوابكرامتكم أحسن ولامنبوذين
وليه بنعتبر جيشنا وأمننا*ضدنا وإحنا من غيرهم موش عايشين
دول ياناس أهلنا ولاد عمنا* وهمه حماة بلدنا وموش محتلين
إن شاء الله تشوفوهم بكره*رجالة بكرامة مايسيبونا مظلومين
تلاقى بعض الناس تهبطكم* وتقولكم مافيش فايدة لأنهم متشائمين
وناس عندها أمل وحماس* بتشجعكم ومعاكم لأنهم متفائلين
لوكان عندالمتشائمون إيمان *ماكانوش يبقوا دايما مهزوزين
لكن المتفائل له وعى وفاهم* وعنده كرامه وإحساس ودين
ياجيش مصر يامحرر سيناء*موش ممكن تكونوا ضد المخلصين
عندى أمل تحققوا مساندتكم* وتصنعوا معادلة إخوانا التونسيين
إصحى يانايم ووحد الدايم * وكفاية غفلة وإترك النايمين
وإرفع رأسك ياأخى وكرامتك* إوعى يمرمغوها تانى بالطين
وياشرطى أخوك إبن بلدك* ويوم عيدك ماتخلهوش حزين
وإفتكراللى قبلك بالإسماعيلية*الشهدابيحيوكم أويعتبروكم ملعونين
وياحسنى إنتى وجمال الأفضل*تمشوابكرامتكم أحسن ولامنبوذين
وليه بنعتبر جيشنا وأمننا*ضدنا وإحنا من غيرهم موش عايشين
دول ياناس أهلنا ولاد عمنا* وهمه حماة بلدنا وموش محتلين
إن شاء الله تشوفوهم بكره*رجالة بكرامة مايسيبونا مظلومين
تلاقى بعض الناس تهبطكم* وتقولكم مافيش فايدة لأنهم متشائمين
وناس عندها أمل وحماس* بتشجعكم ومعاكم لأنهم متفائلين
لوكان عندالمتشائمون إيمان *ماكانوش يبقوا دايما مهزوزين
لكن المتفائل له وعى وفاهم* وعنده كرامه وإحساس ودين
ياجيش مصر يامحرر سيناء*موش ممكن تكونوا ضد المخلصين
عندى أمل تحققوا مساندتكم* وتصنعوا معادلة إخوانا التونسيين
****************************************************
تأليف الشاعر المهندس/ فاروق بن النيل
يوم الأحد 23 يناير 2011 ( الساعة 3 عصرا)
هناك 40 تعليقًا:
معاك حق يا استاذ فاروق
التظاهر ضد الظلم و الفساد و التعذيب لم يعد اختيار بل حتمى
ابواق الحكومة ليل نهار بتقول للشعب اغنية الصراحة راحة و انت ما بتعرفش و مافكمش راجل زى تونس و ان نظام مبارك احسن من بن على مع انه اسوأ على كل الاصعده
طول ما احنا بنتلم بالملايين فى الكورة و التفاهة لكن مش بنصلح البلد لا ح يبقى فيه حق لحي و لا ميت و لا ح يبقى لينا عين نكلم اصلا عن حقوق بره لأننا بلا آدميه جوه...انزل انشالله تقف فى الشارع بس بيوم 25 يناير
كفاية خوف و ذل و اهانه كرامه و نهب و تعذيب و اعتقالات
Tears العزيزة الغالية........
لقد قررت أن أنزل هذه القصيدة مباشرة بعد قراءة البوست الخاص بيكى
لقد شعرت أننا جميعا يجب أن نكون يد واحدة ولذا ألفت منذ ثلاثة أرباع الساعة هذه القصيدة ومن حكمة ربنا أن تنزل مباشرة على البلوجات للناس وقد كانت البوستات الخاصة بى تأخذ حوالى عشر ساعات أو أكثر لتنزل هذه المرة الله معنا فقد نزلت القصيدة والبوست مباشرة ووالله إنى لأشعر أن الله معنا وسوف نصل إن شاء الله إلى مانبغيه
شرفتينى ياتييرز ووالله ساعتها سيكون لى الحق أن أطلب أن أراكى وأقابلك شخصيا لأتعلاف عليكى وأسعد بشخصيتك وروحك الطيبة وبطولتط ووطنيتك الحقيقية
دومتى أختى العزيزة وإلى اللقاء قريبا إن شاء الله تعالى .
هنا فيه كلام عاقل اوى من اعضاء البرلمان الموازى
http://www.youtube.com/watch?v=IsrNp-3cyk0
ان شاء الله يا استاذ فاروق نقدر نعمل كل حاجة بس الغمة تنزاح عشان بلدنا ما تمتش و ولادنا يلاقى بلد ليهم فيه كرامة و رزق و حق فى الحياة مش يجدوا نفسهم يعيشوا فى سجن كبير
تييرز العزيزة الغالية...
سمعت وشاهدت دكتور أيمن نور وأنزلته مباشرة على البوست بآخره شكرا لكى
تييرز العزيزة الغالية......
إن شاء الله تنزاح الغمة ........
ساعتها قبل ماأقفل المدونة سأطلب منكى خاصة ومن الجميع بوجه عام أن نتقابل حتى نهنئ بعضنا بعضا وأموت بعدها وأنا سعيد ومرتاح البال
نتمنى يا استاذ فاروق
و بجد كُنت اتمنى ابقى موجود فى القاهرة يوميها
مش بس علشان المشاركة بس
علشان الواحد يشوف بعينه لأن الكلام على النت و الفرجه من التليفزيون مبتبينش حاجه
و مش مشكاركة بدون اقتناع لا برضه لن انت و وسط اللى بيحصل حماسك هيخدك
هتبقى بقالبك فى الموضوع مش بس نازلين نهتف
ياريت يا استاذ فاروق
بس تكون زى تونس
Ramy
يارب يارامى تتحقق المعجزة ونوصل إن شاء الله للى إحنا عايزينه ونخلص من الظالمين ............
شكرا لك يارامى أنت موجود بقلبك كفاية لحين ميسرة
والله احييك يا استاذنا وربنا يسهل ويبارك فى كل تحرك... والحركة بركة
لا يأس مع الحياة
أستاذنا الفاضل/ صلاح Sal
بارك الله فيك وربنا يجعلها آخر الأحزان
فى هذا اليوم إن شاء الله وشكرا لك صديقى
السلام عليكم
استاذنا عندك حق
اجدت صياغة الواقع كعادتك
أستاذ/ محمود( رحلة حياة.........
الله يبارك فيك وأشكرك على تواجدك وإطراءك
أنافرحانه جدآان في الروح دي
بعدالشرعنك ياأستاذنا
بجدالقصيدة روعة وحماسية للغاية
نفسي ننزل كلنامن بيوتنا ونهزالدنيابثورة كبيرة نغيرفيهاونزيح الشربقي عننا عشان دا عاااااااارعلينابجد
تحياتي ليك وأن شاء الله نعمل ده
أفروديت................
الحماس اللى إنتى فيه وأنا وتييرز والله بس لو لمليون مصرى شريف حاهزوا الدنيا ويزلزلزا مصر وينفجر البركان ويندفع الفيضان ليكتسح فى طريقه الظلم والظالمين سيكونوا أصغر بكثير من عظمة هذا الشعب الأبى والله إنى متفائل جدا وإن شاء الله ستنتهى الغمة ويزال الظلم ويزاح الحاكم الظالم
من راى منكم منكر فليغيره بيده فان لم يستطع فبلسانه فان لم يستطع فبقلبه وهذا اضعف الايام
فيما معاناه
يارب
ما يصاب حد
يارب
يطلعنا منها على خير
يارب
محمود(باحث عن حب..................
فعلا كما قلت المنكر يجب أن يغير باليد أولا فإذالم تستطع فباللسان وإن لم يستطع فبالقلب وذلك أضعف الإيمان
شوف يامحمودكل حالة تتغير تحتاج لتضحيات
فإذاكانت بلدنامصر تحتاج تغيير من أكثر من ثلاثون عاما فلابد من تضحيات وندعواالله:اللهم إنى لاأسألك رد القضاء ولكنى أسألك اللطف فيه "ربنا ظلمنا أنفسنافإغفر لنافإنه لايغفرالذنوب إلا أنت "اللهم وفقنالما تحبه وترضاه لمصر وشعبها وإرفع الظلم عنهم وأيدهم بنصرك على عدوهم وخلصهم من الظالم كما خلصت مصر من فرعون وهامان يارب العالمين "شكرالك صديقى وسيبهاعلى الله
أستاذنا الفاضل: فاروق
السلام عليكم ورحمة الله وبركاته
نسأل الله تعالى أن يقدر مافيه الخير لهذا البلد الطيب وهذا الشعب الصبور....
اللهم آمين
ان شاء الله تفرح يا استاذ فاروق و تفضل فاتح المدونة و تكتب لنا دايما ارائك و تشاركنا
هنا شوية فيديوهات لسه نازلة ممكن تعجبك
فيديو لبنت مصرية جدعه اوى
ح تشارك فى المظاهرات
http://www.youtube.com/watch?v=NdJJzyDWIyU
فيديو لأم مصرية مسنه- والدة الشهيد خالد سعيد و ح تشارك فى المظاهرات
http://www.youtube.com/watch?v=4GPy_wUDvws
ده مواطن مصرى مخنوق اوى
http://www.youtube.com/watch?v=Su_-Vp_HnU0
ده فيديو بيقارن بين الشرطة زمان و الان معمول مخصوص لاحتفالات 25 يناير
http://www.youtube.com/watch?v=-QgdkYLhqO0
قصيدة كأنك مافيش لاحمد فؤاد نجم
http://www.youtube.com/watch?v=8XLFF5kLmx8
http://islam-nogodbutallah.blogspot.com/2011/01/251.html
أستاذنا الفاضل/ محمد الجرايحى.......
آمين يارب العالمين .........
ربنا يسمع دعاءك ودعاء الملايين من هذا الشعب الصبور الغلبان ويمكن تيجى من عند ربنا أثناء أو بعد إنتفاضة الشعب
المصرى كله فى 25 يناير عيد الشرطة المصرية شكرا لكى أخى
الأخت الفاضلة العزيزة الغالية تييرز
أشكرك على مشاعرك ...........
لكنى والله موش عايز من الدنيا إلا حاجة واحدة بس هى حرية الشعب المصرى أما المدونة فلن أقفلها قبل أن أقابلكم جميعا فإذا إتفقنا على قفلها كان بها ومازلت عند رأيى لأن الأمنية إذا تحققت إنتهى كل شيئ ونعيش بسلام .......
سوف أرى إن شاء الله كل فيديو على حده الآن التاسعة صباحا شكرا عزيزتى ربنا مايحرمناش من عطفك وحبك وإخلاصك
واحد من الناس.........
أهلا بيك بمدونتى وسوف أرى الرابط وشكرا
لك شرفتنى .........
لاتحرمنا من زياراتك أخى
تييرز.............
حرام عليكى ليه حرقتى دمى وصحتى عليلة
وأنالو بإيدى كنت خلصتكوا منه بليلة وولاده وكل عيلته لكن ما باليد حيلة
منك لله رفعتيلى ضغطى وسكرى ياأصيلة
ليه يا استاذ فاروق
زمان ايام الاحتلال الانجليزى مثلا لمصر
كان فى مقاومة شعبية
ودلوقتى لا ؟
هى الناس زمان كانت بتفرق عن دلوقتى فى ايه ؟
السؤال ده كتير بسأله لنفسى
ليه زمان مكنش فى مسلم ومسيحى
ليه كان فى غيرة وحب على الارض ؟
ليه وليه و ليه
تقدر حضرتك تجاوبنى ؟
Ms Venus
أعتقد إن كل تطور بالحياة له عيوبه
وليه كمان الأسر المصرية موش مترابطة زى زمان؟!!!!!!!!!!!!!!!!!!!
وليه الأولاد مابيحترموش آبائهم؟!!!!
ليه الطلبة مابيحترموش مدرسينهم؟!!!!
وليه البنات دلوقتى بتتجوز عرفى أو بتعمل اللى عايزاه ومابتختشيش؟!!!!!
وليه ؟ وليه؟ وليه؟!!!!!!!!!!!!
أسئلة كتيرة ماتنتهيش لو عايزة تدورى
المشكلة فينا لازم مع التطور نحافظ على مبادئنا يمكن ده يراه البعض مستحيل
لكنه ممكن بصعوبة بس حايحول حياتنا لشيئ جميل فقدناه من زمان هوه الأصول والعرف والواجب والإحترام والصدق والإخلاص والحب والسعادة والراحة والإستقرار والرضا بالقليل والقناعة
والإطمئنان ...................إلخ
تطور مظاهر الحياةوالتكنولوجيا ماخلتش
فيه مكان كبير بعقلنا وقلبنا ووجداننا
لهذه الأشياء الجميلة إبحثى داخلك حاتلاقيها واخده مساحة صغيرة جدا لكن سرعة رتم الحياة والتكنولوجيا والتطور بقى هوه اللى يحوز على إهتمامنا وكأن عقولنا تلوثت به وإصبح يجرى فى دمائنا وتعودنا عليه ولانستطيع أن نتخلص منه أبدا وهذه هى المشكلة الحقيقية
نحن نملك داخلنا ثلاث شخصيات:
1-الشخصيةالحقيقية:وهى التى نراها ونحن وحدناأمام المرآة بغرفتناالخاصة جدا
2- الشخصية الإجتماعية:وهى التى نتعامل بها مع المجتمع خارج البيت وطبعا
داخله أيضا ولكن مع الضيوف والغرباء
3- الشخصية المثالية: وهى المفروض أن نتعامل بها مع الناس
فإذا إستطعنا أن نقرب بين الثلاث شخصيات لنا بمعنى أن يكون الفارق بينها
ضئيلا جدا نكون قد وصلنا إلى الأفضل
ومن هنا ومن هذه الإختلافات بين الثلاثة تكون العقد والإضرابات النفسية وتكون الأمراض عافاكى الله منها وتمنياتى لكى بصحة وسعادة وشخصية مثالية عزيزتى.
حقك عليه يا استاذ فاروق انا بس قلت لازم تشوف مشاعر الناس ايه
بس عموما هنا فيديو ح يريح اعصابك و يضبط الضغط :)
http://www.youtube.com/watch?v=_QxpXpiLNsI
http://www.youtube.com/watch?v=bi7No8gAv0E
Tears.......... الغالية العزيزة
ماقصدتش غير إن الفيديوهات دى جرعة كبيرة أوى من الأحزان والمآسى دا موش معناه إنى أرفض التفرج عليها لكنى لست الآن مركز فى هذه المآسى فأعلم منها الكثير وشكرا لك مشاعرك الطيبة
سأرى مايخفف ضغطى شكرا لكى عزيزتى
Tears العزيزة الغالية........
ريحتى قلبى الله يريح قلبك ويحقق ماتتمنيه غدا إن شاء الله سأصلى لله تهجدا الليلة عسى الله أن يفك أسر شعب مصر وسأسجد لله شكرا بعده إذا تحقق ماندعوا إليه وهو وحده يعلم أن ماندعوا إليه الحق والعدل ورفع الظلم وكسر الجبار وطرد الظالم وهو وحده لايرضى الظلم لعباده مسلما كان أو مسيحيا أو حتى كافر فهم كلهم عباده وهو لايرضى الظلم لعباده الذين خلقهم هو وحده فلا سلطان لأحد عليهم شكرا لكى تييرز
استاذ فاروق بلاش تعلق آمال كبيرة على الغد لان ده بس بداية الطريق لان خروج اى محتل بيبقى بالعمل التراكمي و بياخد سنين و احنا بنقول يا هادى و بنحاول و عزل بينما المحتل مسلح
تييرز العزيزة الغالية........
أنا بإذن الله متفائل تعرفى ليه عشان كل الحكام الظلمة للعرب إتهزوا وبعضهم عمل أشياء وأصدر قوانين لتخفيض الضرائب والأسعار وده وحده يكفى أما إمتى يخرج الظالم موش بكره بس عارف إن شاء الله موش حايطول مسمار النحش حايندق بكره لكن الدفنه موش حتقعد سنة إن شاء الله عشان إكرام الميت دفنه
وكمان عشان ريحته ماتطلعش ولا إيه
بتمنا من ربنا يعدى اليوم ده على خير بدون تخريب
وبجد كلماتك روووووووووووووعه
حركت مشاعرى الله عليك
السلام عليكم
طبعا .. المظاهرات عندنا مش حتعمل حاجه
بس شفت حنية الحكومه اليومين دول ورجوعهم عن قرارات كانت بتغيظ الشعب كتير وحنية وزير البترول ووزير التضامن والكلام المعسل اللى بيقولوه اليومين دول
اصل دول ناس بيخافوا ما بيختشوش .. بس يا خوفى لا الهوجه تفوت ويرجعوا يعملوا فينا اللى هما عايزينه
تحياتى
السلام عليكم ورحمة الله
دائما استاذ فاروق اشعر وانا فى مدونتك انى فى بيت كبير يسع كل الاصدقاء بقلب اكبر هو قلبك ماشاء الله
دائما كلماتك تنبض بالحياة وثورتك ثورة رجل فى الثلاثين وعزيمتك لا تفتر ابدا بارك الله فيك
أسأل الله تعالى ان يمر الغد بخير ان شاء الله
وان يهيىء لنا من امرنا رشدا
ويحفظ شباب مصر وكثيرا من اخواننا المدونين سيخرجون ان شاء الله فى هذه المظاهرة ربى يحفظهم جميعا
استاذ فاروق
بالنسبة لواجب البوست عندى كل الاصدقاء مدعووين فيه بشكل عام وكم يسعدنى ان ادعوك بشكل خاص هنا لانى فعلا اتمنى ان تكتب انت فى هذا الموضوع واعرف كيف ستكون وزارتك وماذا ستقرر فيها ان شاء الله لو اصبحت رئيس الوزراء :)
http://lolocat-q.blogspot.com/2011/01/blog-post_24.html
وطبعا لان الاصدقاء كثيرين فما كتبت كل الاسماء لكن اتمنى من حضرتك تقبل حل هذا الواجب فيسعدنى جدا مشاركتك فيه
تحياتى وتقديرى
دمت بخير
نبع الغرام....إيناس الغالية العزيزة
سعيد جدا بتواجدك وتفاعلك معنا ده وحده شيئ طيب ولاتتركى نفسك للوحده
فوالله ياإيناس مافيش واحد أو واحده من النيت أو المدونات أعرفها شخصيا أو حتى شوفتهاومع هذا أنتم عزاز عليا وغاليين أوى أوى وكأنكم أهلى وكأنى أعرفكم من زمان وفى مخيلتى صورة لشخصية كل واحد منكم وكأنى أراه وأحدثه حديثا خاصا به ويعلم الله أن أمنيتى أن أراكم بعينى لكن لا أود ذلك قبل أن تتحقق أمنيتى أتعلمين ماهى تلك الأمنية
أجيبى إن كنتى فعلا قد عدتى كما عرفتك وكما عرفك كل المدونين :
إنسانة متفائلة طموحة كريمة محترمة قوية
عصبية ذكية مبدعة مندفعة متردده لكن قلبها الكبير يـسع جميـع البشر !*!*!
عقلها الحرير يصنع ربيع العمر !*!*!
أم هريرة( لولو كات).........
أولا : أشكرك على كلامك الطيب
ثانيا:إوعى تزعلى من نقدى لوزاراتك
ثالثا: أنا أصلا مشكلة يعنى
" مابعجبنيش العجب حتى الصيام فى رجب "
طبعا أقول مثل فقط متداول لكنى على أية حال لاأريد منصبا فى هذا البلد لأنى موش حاكون رحيم وحاكون قاسى جدا مع المتسيب والمستهتر والنصاب والفاسد والكاذب والمنافق والمرتشى ولن أفرق بين أحدا فى الدين ولا فى النسب والحسب
سيكونون عندى سواء وسأطبق قانونا جديدا مختلفا عن القوانين الفرنسية والإنجليزية التى نتبعها حاليا وسيكون هذا القانون شبيها جدا بقوانين الله فى الأرض والتى نزلت على جميع الأنبياء وللأسف تم محوها وطبعا هى موجودة بالقرآن الكريم الذى هو دستور لكل البشر سواء رضوا أو لم يرضوا بدون تعصب وبدون ظلم .
لذا أعتقد أنى لاأصلح أن أكون مسئولا كبيرا فى هذا البلد فقد جربت نفسى خمس سنوات بمسئولية كبيرة وكرهنى معظم مرؤسي وللأسف وقفوا ضدى ولفقوا لى مشاكل وشكاوى وعندما تركتهم الآن يقولون لغيرى ممن كان ضدى والآن مسئولا
ويقولون هذاأيضالى بطريقة غير مباشرة: الأستاذ فاروق أحسن واحد مسكنا( يعنى تقلد منصبا مسئولا علينا) .....
ويقولوا : فين أيامك ياأستاذ فاروق
المشكلة أن معظم الشعب المصرى ينطبق عليه قول الله تعالى:" ولكن أكثرهم للحق كارهون" الزخرف " وأكثرهم للحق كارهون " المؤمنون 70
شكرا لكى عزيزتى أمنيتى تعرفينها لحظتها سأقفل المدونة بس بعد أن أطلب منكم جميعا أن أراكم لأودعكم بمصر الحرة الأبية الكريمة المرفوعة الرأس بالعالم
فشكووووووووووووووووووووووووووووول
آسف إنى أخرتك والله بدون قصد .....
صديقى عم صلاح إزيك وحشتنى وفين أيامك وتخاريفك عقلت دلوقتى ولا إيه قصدى إوعى تفهمه غلط يعنى بطلت تخاريف ولا لسة ماآنش الأوان ........
المظاهرات عندنا حاتعمل كتير بس موش مرة واحدة لأن هذه الحكومة ومن يرأسها جتتها منحسة وجبلة ولازقين بغرا يعنى محتاجين 100 درجة مئوية( درجة الغليان)
حتى يذبوا ويتحركوا ويغوروا وأرجو ألا تيأس الناس المتحمسة وإلا حاعتبرك من ضمن الحزب المزيف يمكن ياواد ياصلاح إنت تبعهم ولا إيه بالضبط ......
لما الهوجة تفوت كما تقول ويعملوا فينا اللى همه عايزينه يبقى نستاهل ننضرب بالجزمة ومانساويش كلنا واحد تونسى ولاحتى اللى ولع فى نفسه ...
تبارك الرحمن ..
قلم مميز وافكار نيرة
تقبل مروري استاذي
آجمل التحايا واعطرها
أستاذه هيفاء.........
أهلا بيكى بمدونتى وشرفتينى أختى لقد زدتى كلماتى وشعرى روعة وإبداعا فشكرا لكى على تواجدك وإطراءك
أختى لاتحرمينا من زياراتك
أستاذه هيفاء.........
أهلا بيكى بمدونتى وشرفتينى أختى لقد زدتى كلماتى وشعرى روعة وإبداعا فشكرا لكى على تواجدك وإطراءك
أختى لاتحرمينا من زياراتك
التظاهر ضد الظلم و الفساد و التعذيب لم يعد اختيار بل حتمى
* في الصباح كلمني ابني الصغير بالمحمول واعلمني ان هنك مظاهرة في وسط المدينة مع المعلمين والاساتذة وطلب مني ان يشارك فيها.سمحت له كالعادة مع نصيحة الاب لي ابنه بان يمشي في وسطها وليس في اولها ولا في ماخرتها وان لا يشارك الا بالهتفات وليس بالتخريب*
فرحت كثرا لان الاطفال اصبحوا لهم حس وطني اكثر من قبل فلا خوف عليك يا تونس
إرسال تعليق